لو كنت وزيرة إعلام

شسوي؟

أول شيء أشيل الوزراة بكبرها لأن محد ظل ما اشتكى منها و أبني وحدة بمواصفات عالمية تلوق بمقام الإعلام. ثاني شيء أشيل المذيعين كلهم لأن الصراحة تنقال: التلفزيون ما مات إلا منهم! كلما أحاول أغصب نفسي و أطالع قناة الكويت الأولى ألقى نفسي أغير القناة على طول .. ليش؟ لأن المذيعين ميتين بكل معنى الكلمة .. وظيفتهم في تلفزيون الكويت صارت فقط للسؤال و الإستجواب و نقل الفعاليات .. ما أقدر أشوف مذيع يتفاعل مع اللي قاعد ينقله لي ... و لا قاعدة أعرف شنو رأيه من النقاش أو الحوار اللي قاعد يسويه .. ودي أشوف أسنانهم !! كلا مكشرين و معصبين ؟؟ يعني باللا شالفرق بينهم و بين أوبرا ؟ أوبرا على الأقل تشمل لك الموضوع من كل جوانبه في خلال ساعة فقط ، و في خلال الساعة هذه تقدر تعرف رأيها و شنو موقفها من الموضوع اللي قاعد تطرحه .. حتى لو كان موضوع جدي للغاية تلقاها تضحك و تعطي نكهة للجو ... و لا تحسها إنها في موقف "إسأل" بس!! و لكنها تأخذ و تعطي مع الضيف ، يعني ولا جنك قاعد تشوف تلفزيون ... لا الصراحة ، انا بوديهم ياخذون دورات عندها

ثالث شيء أغير كل أجهزة البث من غرفة الكنترول بكبرها لي السماعة اللي يلبسها المذيع .. أخليه بث ديجيتال يواكب الألفية .. بس ! ملينا من بث التسعينات !! و بالإضافة ، راح اعطي دورات في فن تصميم الجرافيكس عشان نشوف دعايات و فواصل تعيد الحياة حق المشاهد مرة ثانية

رابع شيء أسوي برامج مسابقات بجوائز تسوى!! شنو يقصون علينا بعسل العويد و الا إشتراك جريدة!! مو لهالدرجة عاد !! يعني مبدأ خذ من جيبه و عايده موجود .. فليش البخل في الجوائز؟؟ و مو بس أخلي البرامج هذه في رمضان .. لا!! أخليها طول السنة عشان

الوزارة تنتعش شوي

بس للأسف هالإجراءات هذه تأخذ وقت و يمكن من الصعب تنفيذها .. عشان جذي انا بغير منصبي لمنصب أعلى .. فشنو راح أسوي؟

أول شيء أسويه إني أسفر هالعمالة الأسوية اللي مستحلة البلد .. هالمليون كلهم أسفرهم .. بس ملينا !! وين ما نروح جنه قاعدين بقندهار والا مومباي !! و اشلع جليب الشيوخ و خيطان و الحساوي من عرجهم و أوزعهم قسايم و أراضي حق المواطنين .. يعني ذول ميخالف يسكنون هني بس المسكين اللي معاشه على قده يشتري بيت يم الحدود !!! ثاني شيء اشيل تكاسي الجوال اللي مسوين فوضى بالديرة

هني توصل حق مشكلة المرور و هذا رابع شيء أسويه .. اخلي الشرطة تتزوع بكل زاوية بالديرة حق ذول اللي ما يحترمون قانون المرور من تخطر أدوار لي اللي اييلك من فوق باللفة لي اللي يصفط ممنوع الوقوف: عاد ذول صج باطين جبدي ... مو بس اصكهم مخالفات اللا بعد اشيل سياييرهم !! ذول اللي كلا صافطين بالداون تاون صوب المباركية و شركات الوطنية و البنوك و الصفاة و الخياطين ممنوع الوقوف .. تلقون الشارع 3 سايدات : صاكين اثنين و ياللا تقدر تمشي بسيارك بالثالث !!!بس !!! زمن "الكيرليس" و الكسل راح و ياويله اللي اشوفه صافط جذي

رابع شيء اسوي محكمة اسمها محكمة القضايا الاجتماعية و المدنية .. يعني حق قضايا البسيطة اللي يخلصونها بيوم واحد .. مثل جدج جودي اللي في امريكا .. حق المشاكل اللي تصير بين الجيران و اذا شفت انه دورك خذوه و السبة الواسطه .. هذه المحكمة حق القضايا هذه
الواسطة عاد شيء ثاني ... راح امسحها من الوجود و راح اخليها جريمة يعاقب عليها القانون لأنها مرض يهدد الكفاءات الشابة اللي تحتاج الى تطوير و تقدير في الديرة .. وفوق هذا .. راح اعرض مكافئات مالية حق اللي يشوف صارت جدامه حالة واسطة

خامس شيء و هذا اهم شيء .. ازيد المعاشات بحيث لا يقل معاش المواطن عن 1000 دينار غير البدلات طبعا .. ازيد بدل زوجية اللي قاصين علي الريال فيه لي 300 دينار و بدل الاطفال لي 150 دينار حق الطفل الواحد ... و طبعا لانه ماكو عمالة اسيوية في الديرة فراح يصير صعب انه الواحد يحصل مساعدة منزلية .. في هذه الحالة راح امشي معاش حق اللي ما عندها مدبرة منزل و اهي الأم بحد ذاتها اللي تبي تصير ربة منزل .. فأكافئها و اشجعها و امشي لها معاش طول العمر .. للأسف جيل اليوم إتكالي و ما يتحلى بالمسؤولية .. حتى القيم الاصيلة اللي تربوا عليها اهلنا راحت و السبة و الخدم .. فألحين جاء الدور أنه الام تربي عيالها بإيدها و تخرج أجيال تحي البلد و يعتمد عليها في تطويره

سادس شيء اغير معالم البلد .. اشيل الإحتكار التجاري للواجهة البحرية ...افتح مجمعات خاصة لدور السينما .. استغل جزيرة بوبيان لأنها أكبر جزيرة و أخليها جزيرة إستوائية: اغطيها كلها بقبة زجاجية عشان اخلق جو استوائي داخلها .. بعد ليش تروحون هاواي ؟ ايضا أعيد ترميم جزيرة فيلكا و افتح فيها فنادق و منتجعات و ايضا قسايم حق المواطنين اللي حابين يستقرون بعيد عن ازعاج المدينة ... ازيد من الأشجار و المزروعات .. و اعدل البنية التحتية للشوارع و الجسور

و على طاري الجسور و الشوارع .. افتح كلية بتخصص جديد اسمه العمارة و البناء .. يعني اخلي الكويتي نفسه يبني بيته بإيده .. اخليها اهوة يبني الشوارع و المباني و المجمعات .. ما فيها شيء لو الكويتي عمر ديرته بأيده .. بالعكس .. هذا راح يساعد على تعاون و ترابط الكويتي مع اخوه و يقوي حبهم للوطن

.

طبعا في وايد اشياء ودي اسويها بس ليش اعور راسي ؟؟ الديرة ما تبي اصلاحيين .... ف ................. نعيش و ناكل غيرها